لعنبو رجل ٍ يشوف المرجلهْ فضرب الحريم

لعنبو رجل ٍ يشوف المرجلهْ فضرب الحريم !!
من متى كانت رجولتكم على ظهر النسا ؟!

(ضلع ٍ أعوج ) بس مو دايم بكسْره يستقيم !!
قوّمُوه فْعُمْر لينه .. يستقيم اليا قسى

يا رجال اليوم ( رفقاً بالقوارير ) .. و قديم ..
قالوا: (أخيَرْكم .. رحيم الصبح // مِكرام المسا )

ما يبات الليل كاسرهن .. و الى جَنْ البهيم ..
مركب يدينه على مرسى مدامعهن رسى

بيض الله وجه جابرهن بعيشات النعيم
و سود الله وجه جابرهن على عيشة أسى

ذاكر حقوقه ليا قيل ( اربع ) بشرع الحكيم
و إن وصل لين ( اعدلوا ) طنش ابو الشرع و نسى !!

كِن ( سي السيد ) خلقْه الله على أهله زعيم ..
طاغي معربدْ .. قسم باللي بْيحاسِبْه .. ايخسا !!

لا الرجوله بالعناد و لا هي بقهر الحريم
ليمتى و العنف صاير ظاهره ضد النسا ؟!